Allar manneskjur prumpa. Að meðaltali um 23 sinnum á sólarhring. Hvort það heyrist er önnur saga.

En þó hægt sé, með einstakri lagni að koma í veg fyrir hljóðið, þá er ekki hægt að koma í veg fyrir lyktina og vísindalegar rannsóknir sýna að viðrekstur kvenna lyktar verr en karla.

Eins og segir í frétt blaðsins New York Post um málið var það magalæknir að nafni Michael Levitt sem vildi vita hvað það væri sem ylli slæmri prumpulykt. Það er að segja, hvaða gös.

Viðrekstri 16 heilbrigðra manneskja var safnað í þétta poka og innihaldið efnagreint. Vond lykt er almennt frekar huglæg en óháðir dómarar voru einnig fengnir til þess að meta lyktina. Það er hversu ágeng og slæm hún væri úr hverjum poka.

Komst Levitt að því að það var einkum brennisteinsefnasambönd sem gáfu verstu lyktina, sérstaklega vetnissúlfíð. Er það lykt sem minnir helst á úldið egg.

Kom í ljós að þó að viðrekstur karlmanna væri almenn meiri en kvenna þá var meira af þessum verr lyktandi efnum í viðrekstri kvenna, einkum vetnissúlfíði. Hjá dómurunum, sem vissu ekki hverju þeir voru að lykta af, komu pokar kvennanna verr út en karlanna.

Hins vegar sýna aðrar rannsóknir að viðrekstur kvenna sé í raun hollari en karla. Það er vetnissúlfíð getur unnið gegn heilabilun og Alzheimer sjúkdóminum. Hafa ber þó í huga að það er eitrað í of miklu magni.