Dómur var kveðinn upp í Héraðsdómi Reykjavíkur þann 4. nóvember yfir manni sem ók á gangandi vegfaranda við Höfðabakka, hjá Árbæjarsafni, þann 10. desember árið 2022.
Í ákæru segir að ákært sé „fyrir hegningar- og umferðarlagabrot með því að hafa, laugardaginn 10. desember 2022, ekið bifreiðinni […], án nægilegrar varúðar og aðgæslu norður Höfðabakka í Reykjavík, við Árbæjarsafnið, […] og fyrir að hafa notað farsíma án handfrjáls búnaðar við aksturinn, en bifreiðin hafnaði á A, kt. […], sem kraup á veginum, með þeim afleiðingum að hann hlaut öndunar- og blóðrásarbilun eftir áverka á brjóstið og bolinn, sem leiddi til þess að hann lést á bráðamóttöku Landspítalans skömmu síðar. M. 007-2022-[…]“
Er hinn ákærði ók á vegfarandann hafði áður verið ekið á hann. Atvikinu er lýst svo í skýrslu Rannsóknarnefndar samgönguslysa:
„Þann 10. desember 2022 var gangandi vegfarandi að þvera Höfðabakka rétt sunnan við biðstöð strætisvagna á móts við Árbæjarsafn. Á sama tíma var bifreið ekið Höfðabakka til suðurs og á gangandi vegfarandann. Ökumaður bifreiðarinnar ók af vettvangi án þess að tilkynna um atvikið. Vegfarandinn lá á eystri akrein Höfðabakka. Stuttu síðar var Suzuki fólksbifreið ekið Höfðabakka til norðurs. Þegar ökumaður Suzuki bifreiðarinnar kom auga á vegfarandann liggjandi á götunni, sveigði hann til vinstri en náði ekki að forðast árekstur við vegfarandann. Á vestari akrein, með akstursátt til suðurs Höfðabakka, var Toyota fólksbifreið á litlum hraða og lenti Suzuki bifreiðin á hlið hennar þegar henni var beygt frá vegfarandanum.
Vegfarandinn sem ekið var á lést á Landspítala seinna um nóttina af völdum fjöláverka.“
Það er síðarnefndi ökumaðurinn í lýsingunni hér að ofan sem var ákærður í þessu máli, þ.e. ökumaður Suzuki bílsins.
Hinn ákærði játaði sök samkvæmt breyttri ákæru. Í dómnum kemur fram að hann hafi átt erfitt með andlega líðan eftir atburðinn og segir frá því í vottorði frá sálfræðingi. „Þá eru atvik fremur sérstæð, eins og þau birtast í málsgögnum,“ segir í dómnum og er þar væntanlega vísað til þess að búið var að keyra á vegfarandann rétt á undan og hann kaup niður á veginum. Ennfremur hafði það vægi fyrir niðurstöðu dómara að ákærði hefur ekki áður gerst brotlegur við lög.
Niðurstaðan er sú að refsingu ákærða er frestað og skal hún falla niður að tveimur árum liðnum, haldi ákærði skilorð. Hann þarf hins vegar að greiða tæplega 1,5 milljónir króna í málskostnað.
