„Þriðja heimsstyrjöldin er þegar hafin. Það eru þegar bardagar í gangi sem eru samhæfðir í mörgum ríkjum,“ segir Jamie Dimon, forstjóri JP Morgan.

Dimon var fyrirlesari á ráðstefnu Institute of International Finance, alþjóðlegra samtaka fjármálafyrirtækja, á dögunum þar sem hann varaði sterklega við þróun mála í heiminum eins og hún blasir við. Benti hann á að stríðin í Úkraínu og í Mið-Austurlöndum væru alþjóðleg átök.

„Ég tala um hættuna sem við stöndum frammi fyrir ef illa fer. Við setjum upp sviðsmyndir sem ykkur myndi bregða við að sjá. Ég vil ekki einu sinni nefna þessar sviðsmyndir,“ sagði hann. Bætti hann við að ríki eins og Kína, Rússland, Norður-Kórea og Íran væru „öxulveldi hins illa“ og þeirra markmið væri að sundra þeirri samstöðu sem náðist eftir seinni heimsstyrjöldina.

„Og þetta er eitthvað sem er að gerast núna. Þau eru ekki að tala um að bíða í 20 ár. Hættan er stórkostleg ef þið kynnið ykkur söguna,“ sagði hann.

„Hugsanlega mun hættan minnka með tímanum en mistök gerast,“ sagði hann og hvatti fólk til að hugsa um aðdraganda seinni heimsstyrjaldarinnar þegar Tékkóslóvakíu var skipt upp. Ástandið í Úkraínu í dag minni dálítið á stöðuna þá.

News.com.au fjallar um þetta og bendir á að Jamie sé ekki sá eini sem hefur varað við þessari þróun að undanförnu.

Charles Flynn, háttsettur bandarískur herforingi, sagði á varnarmálafundi í Washington á dögunum að vaxandi samvinna „alþjóðlegra einræðisherra“ hefði skapað mjög hættulega blöndu.