Örn Geirdal, 48 ára gamall byggingaverktaki og fjölskyldufaðir í Vesturbænum, hefur verið dæmdur í sex ára fangelsi fyrir hnífstunguárás á Hofsvallagötu í janúar á þessu ári.
Árásin átti sér stað um miðja nótt. Örn er sagður hafa verið á göngu á miðjum akvegi þegar kona og maður sem voru á gangi þar rétt hjá báðu hann um að gæta að sér vegna bílaumferðar. Hann er sagður hafa brugðist við með því að ráðast á manninn, slá hann til hans tvisvar með hníf í hendinni svo brotaþolinn hlaut af tvær hnífstungur. Hann var fluttur á slysadeild og var um tíma í lífshættu.
Örn neitaði sök fyrir dómi og sagði að parið hafi ráðist á sig. Hann kannaðist ekki við að hafa lagt til mannsins með hnífi.
Í yfirheyrslu saksóknara fyrir dómi lýsti Örn atvikum fyrr um kvöldið þannig að hann hafi eldað mat og borðið með fjölskyldu sinni og hann og sambýliskona hans hafi fengið sér rósavín með matnum og hann síðan fengið sér tvo einfalda rommdrykki.
Aðspurður kannaðist hann ekki við að hafa tekið nein lyf eða fíkniefni heldur aðeins nokkra áfenga drykki.
Örn segist stríða við töluvert minnisleysi og var frásögn hans af atburðum næturinnar gloppótt.
Aðspurður kannaðist hann við að hafa verið með hníf meðferðis en um hafi verið að ræða vinnuhníf sem var í vinnufötunum sem hann klæddist um nóttina eftir að hann vaknaði.
Dómur yfir Erni hefur ekki verið birtur á vefsíðu dómstólanna en Vísir greinir frá því að hann hafi verið sakfelldur og dæmdur í sex ára fangelsi.
