Kimberly Cheatle, yfirmaður bandarísku leyniþjónustunnar, hefur sagt af sér. Ekki er vika liðin síðan Cheatle aftók slíkt með öllu en hún hefur verið undir miklum þrýsingi í kjölfar banatilræðis sem Donald Trump, fyrrverandi Bandaríkjaforseti, varð fyrir þann 13. júlí síðastliðinn. Sagði Cheatle í afsagnarbréfi að hún hafi alltaf sett hagsmuni stofnunarinnar ofar sínum persónulegu hagsmunum og í ljósi þess hafi hún ekki séð annan leik í stöðunni en að stíga frá borði.

Cheatle mætti í gær fyrir eftirlits- og ábyrgðanefnd Bandaríkjaþings og þar var hún tekin til bæna af þingmönnum úr flokki Demókrata og Repúblikana. Var almenn óánægja með svör hennar eða öllu heldur skort þar á. Til að mynda svaraði hún spurningu um af hverju að engin leyniþjónustumaður var á þakinu, þaðan sem Thomas Matthews Crooks skaut að Trump, á þá leið að þakið væri of bratt og því hefði það getað ógnað öryggi starfsmanna að koma sér þar fyrir.

Var meðal annars lögð fram sú tillaga að ákæra Cheatle fyrir framkvæmd leyniþjónustunnar þennan örlagaríka dag en síðan komust þingmenn að þeirri niðurstöðu að „fullkomin vanhæfni“ væri ekki refsiverð.

Cheatle hefur starfað hjá leyniþjónustunni í tæpa þrjá áratugi en hún tók við starf yfirmanns stofnunnarinnar árið 2022. Hún er aðeins önnur konan sem gegnir stöðunni.