Tómas hefur kallað eftir því að fá aðgang að sjálfsvígsbréfi sem sonur hans skildi eftir sig, en um var að ræða handskrifað bréf sem Tómas virðist hafa fengið ritskoðaða og vélritaða útgáfu af.
Fjallað var ítarlega um málið á vef Nútímans í morgun þar sem Tómas lýsti furðu sinni á þessu.
„Drengurinn minn skilur eftir sig sjálfsvígsbréf og við fjölskyldan höfum ekki fengið það afhent. Það eina sem við fengum var rafræn útgáfa af sjálfsvígsbréfinu. Eitthvað sem lögreglan hefur slegið inn í Word og svo sent á okkur. Gott og vel. Það væri ásættanlegt ef það innihéldi allt sem stóð í bréfinu. Það er bara ekki þannig,“ sagði Tómas við Nútímann.
Í frétt Nútímans kom fram að lögregla hefði ekki svarað því hvers vegna handskrifaða bréfið var ekki afhent. Það var svo eftir að fréttin birtist í morgun að svar fékkst frá lögreglunni á Suðurlandi þar sem sagði:
„Hluti bréfsins er ekki beint til þeirra aðstandenda sem hafa óskað eftir gögnum málsins heldur til annars aðila og því var tekin ákvörðun á þessu stigi að afhenda þeim ekki bréfið í heild sinni.“
Tómas segir að þessi svör lögreglunnar séu ekki fullnægjandi.
„Það er verið að leyna hlutum, af hverju tóku þeir ekki mynd af bréfinu í staðinn fyrir að láta okkur fá á prenti þessa síðustu línu. Hvað veit ég hvort þetta er falsað eða ekki? Það er ófagmannlega að þessu staðið,“ segir Tómas í samtali við DV. Hann kveðst hafa sent beiðni til Umboðsmanns Alþingis þar sem hann kallar eftir rannsókn á starfsháttum lögreglu.
Tómas hefur áður gagnrýnt harðlega hlut lögreglu í aðdragandanum að láti sonar hans. Ingvi var kominn í opið úrræði á áfangaheimilinu Vernd og var nálægt því að ljúka afplánun þegar hann var handtekinn vegna kæru, fluttur í einangrun á Hólmsheiði og svo á Litla-Hraun.
„Sérsveitin handtók hann inni á Vernd vegna kæru fyrir alvarlegt brot. En nú vil ég fá að vita hvaða sönnunargagna hafði verið aflað, voru forsendur fyrir þessum harkalegu aðgerðum? Ég veit að þessi handtaka var honum mikið áfall. Þetta þurfum við að fá allt upp á borðið,“ sagði Tómas meðal annars í viðtali við DV fyrir skemmstu.
Undir þetta hafa samtökin Afstaða meðal annars tekið en í yfirlýsingu eftir andlát Ingva Hrafns sögðu samtökin meðal annars: „Það að vera sviptur frelsi með þeim hætti, án dóms eða yfirleitt sönnunarfærslu, er gríðarlega þungbært og ætti fólk í þeirri stöðu að vera undir eftirliti sérfræðinga í geðheilbrigði og sálgæslu.“
