Samkvæmt traustum heimildum DV gekk maður berserksgang á Þorrablóti Hafnarfjarðar laugardaginn 10. febrúar, kastaði borði og stólum í gesti í sal, hélt þar næst út á bílaplan og kastaði skilti í bíl.

Að minnsta kosti tveir gestir á skemmtuninni urðu að leita á bráðamóttöku eftir berserksgang mannsins. Hlaut önnur konan alvarlega áverka á hendi og þurfti að flytja hana með sjúkrabíl á bráðamóttöku. Er þar um að ræða eldri konu sem vinnur með höndunum. Hin konan sem DV veit til að slasaðist í æðiskasti mannsins var marin og bólgin eftir ofbeldi hans.

Fjölmörg vitni voru að athæfi mannsins og hafa einhverjir sem urðu fyrir ofbeldi hans óskað eftir að komast í samband við vitni að uppákomunni. Maðurinn var á meðal gesta á skemmtuninni og má teljast vera í nokkuð virtri stöðu í samfélaginu.

Þorrablótið var haldið í Íþróttahúsinu að Ásvöllum og var mikið um dýrðir. Meðal þeirra sem skemmtu voru Stuðbandið, Eyþór Ingi, Auðunn Blöndal, Steindi og Sigga Beinteins.

Knattspyrnufélagið Haukar hafði umsjón með þorrablótinu. DV hefur ekki náð í framkvæmdastjóra Hauka vegna málsins en í svari við fyrirspurn á Facebook-síðu viðburðarins er gefið upp símanúmer Hauka. Þar svarar ekki í síma.

Fréttin verður uppfærð ef frekari upplýsingar berast.