Margir hafa fengið hringingu úr símanúmerinu 94913741465 síðustu sólarhringa. 94 er landsnúmerið á Sri Lanka og eflaust ekki margir hér á landi sem eiga von á símtali þaðan. Svo grimmt hefur kveðið að þessu að dæmi eru um að hringt hafi verið samstundis úr þessu númeri í alla símana á sama heimilinu.

En það er margt að varast í þessu og ráðlegt að svara alls ekki ef hringt er úr þessu númeri. Þetta er ekkert annað en tilraun til svikastarfsemi af einhverju tagi.

DV.is hefur heyrt frá nokkrum sem hafa fengið hringingu úr þessu númeri en sem betur fer svaraði enginn þeirra og enginn hringdi til baka. Líklegt má telja að markmiðið sé einmitt að fá fólk til að hringja til baka. Þá gætu vandræðin hafist fyrir alvöru því væntanlega er þá hringt í gjaldskylt númer þar sem hver sekúnda getur kostað stórfé.

Einnig er rétt að hugsa sig vel um áður en svarað er í símann þegar hringt er úr ókunnugum erlendum númerum. Ef þú átt ekki von á símtali erlendis frá, þá skaltu staldra aðeins við áður en þú svarar eða hringir tilbaka. Flestir eru með farsíma í dag og ef íslenskur vinur eða ættingi þarf að ná í þig þá eru miklar líkur á að það verði gert úr íslensku númeri.