Nú er rúmlega mánuður síðan Valeri Gerasimov, æðsti herforingi rússneska hersins, sást síðast opinberlega. Margir erlendir fjölmiðlar hafa velt því upp að undanförnu hvort hann hafi verið drepinn í flugskeytaárás Úkraínumanna á rússneska stjórnstöð á Krím þann 4. janúar.
Undir fyrirsögninni „Hvar er Gerasimov hershöfðingi og af hverju skiptir það máli“ birti Kyiv Post frétt um að 23 rússneskir hermenn hefðu fallið í árásinni á Sakyherstöðina á Krím. Fimm þeirra eru sagðir hafa verið háttsettir herforingjar. Blaðið vísar í rússnesku Telegramrásina Ordinary Tsarism og WarVehicleTracker á samfélagsmiðlinum X um að Gerasimov hafi hugsanlega verið í herstöðinni þegar úkraínsku flugskeytin hæfðu skotmark sitt.
Orðrómar um þetta hafa grasserað á samfélagsmiðlum og margir hafa furðað sig á að Gerasimov hafi ekki sést síðan um áramótin. Einn þeirra er bandaríski hernaðarsérfræðingurinn og prófessorinn Jay Kallberg sem fylgist mjög náið með gangi stríðsins.
DAY 28: Friday is day 28 of General Gerasimov's disappearance. A US advent calendar has 25 days for comparison. Another comparison is that General Gerasimov starting his 5th straight Spring Break. Something has happened. #Gerasimov pic.twitter.com/92y60UFVxA
— Jan Kallberg, Ph.D. (@Cyberdefensecom) January 26, 2024
Þrátt fyrir að engar beinharðar sannanir séu fyrir að Gerasimov hafi fallið í árásinni hafa margir fjölmiðlar, þar á meðal Newsweek, bent á að ráðamenn í Kreml hafi ekki tjáð sig um orðrómana. Blaðið setti sig í samband við rússnesk stjórnvöld vegna málsins en þau hafa ekki svarað.
Gerasimov sást síðast á líf þann 29. desember þegar hann afhenti hópi rússneskra hermanna orður fyrir að hafa tekið þátt í að hertaka bæinn Marinka í Donetsk.
Ef rétt reynist að Gerasimov hafi fallið þá var hann ekki fyrsti háttsetti rússneski herforinginn til að falla í stríðinu.
Í september á síðasta ári bárust fréttir af því að úkraínskir sérsveitarmenn hefðu drepið Viktor Sokolov, aðmírál og yfirmann Svartahafsflota Rússa, í árás á höfuðstöðvar Svartahafsflotans á Krím. Rússneska varnarmálaráðuneytið vísaði þessu á bug og birti myndir af Sokolov á myndfundi með Sergei Shoigu, varnarmálaráðherra, og öðrum háttsettum hershöfðingjum. Myndbirtingin varð ekki til þess að slá á vangaveltur og á samfélagsmiðlum undruðust margir að Sokolov hreyfði sig ekki á myndbandsupptökunni. Tveimur dögum síðar birti rússnesk sjónvarpsstöð myndband af Sokolov að sæma hermenn orðum en síðan kom í ljós að það gerði hann fjórum dögum áður en árásin á höfuðstöðvarnar átti sér stað. Hann hefur ekki sést síðan í september.
Gerasimov er talinn vera þriðji valdamesti maðurinn í rússneska hernum, á eftir Pútin og Shoigu varnarmálaráðherra.
