Þetta sagði Lord Robertson, fyrrum yfirmaður NATO, í samtali við Sky News. Hann sagði að málefni Úkraínu verði að vera efst á baugi því Úkraínumenn séu að berjast fyrir okkur hin.
„Það sem ég vil er skuldbinding til margra ára,“ sagði hann og bætti við að það eina sem Kremlverjar taki eftir sé hversu lengi stutt verði við bakið á Úkraínu.
Hvað varðar innrás Rússa í Úkraínu sagði hann að hún hafi „algjörlega velt heimsskipaninni“ sem við höfðum vanist og að ef Pútín komist upp með að leggja 44 milljóna manna ríki undir sig í hjarta Evrópu, þá sé spurningin hvar hann muni láta staðar numið. „Hann mun svo sannarlega ekki láta staðar numið við Úkraínu,“ sagði hann og bætti við: „Það mun hafa þær afleiðingar að við hin verðum einnig í hættu af því að árangur hans í Úkraínu mun hvetja hann áfram.“
