Óhætt er að segja að Pútín hefði ekki getað orðað nýjustu ummæli hans betur og hefði mátt halda að skilaboðin komi beint frá Kreml en ekki forsætisráðherra NATO- og ESB-ríkis.
Á þriðjudaginn sagði Fico á fréttamannafundi: „Það er ekkert stríð í Kyiv“ og sagði um leið að íbúar borgarinnar „lifi eðlilegu lífi“.
„Heldur þú í alvöru að það sé stríð í Kyiv? Þú ert að grínast. Ég vona að þú meinir þetta ekki í fullri alvöru. Lífið í borginni er eins og venjulega,“ sagði hann þegar blaðamaður spurði hann af hverju hann færi ekki til Kyiv til að fá betri yfirsýn yfir stríðsrekstur Pútíns í Úkraínu. Fico fundaði með forsætisráðherra Úkraínu í gær í úkraínska bænum Uzhhorod sem er nærri slóvensku landamærunum.
Fico sagði að það væri miklu hentugra að halda fundinn í Uzhhorod og að það hefðu verið Úkraínumenn sem lögðu til að hann færi fram þar.
Ummæli Fico reittu úkraínska stjórnmálamenn til reiði enn á ný en þeir voru fyrir mjög reiðir vegna ummæla Fico um síðustu helgi en þau verða að teljast ansi hliðholl Rússum.
Þá sagðist hann vera á móti aðild Úkraínu að NATO og að hann myndi segja úkraínska starfsbróður sínum það og að hann muni beita neitunarvaldi gegn inngöngu Úkraínu í NATO. Aðild gæti orðið til þess að hrinda þriðju heimsstyrjöldinni af stað. Hann sagði einnig að Úkraína væri ekkert annað en leppríki Bandaríkjanna og að Úkraína væri „eitt spilltasta land heims“. „Úkraína er ekki sjálfstætt og fullvalda ríki,“ sagði hann.
