Íslenskur karlmaður, 66 ára, var handtekinn á Tenerife á dögunum vegna gruns um fjársvik. Maðurinn er sagður hafa tilkynnt lögreglu að hann hefði verið rændur og átta þúsund evrur, tæplega 1,2 milljónir króna, teknar út af kortinu hans í kjölfarið.

Canarian Weekly greinir frá málinu en Mannlíf greindi fyrst frá málinu hér á landi.

Í fréttinni kemur fram að lögregla hafi skoðað málið og mætt á staðinn, skemmtistað eða bar, þar sem kort mannsins var notað. Kom þá upp úr krafsinu að maðurinn hafði dvalið á umræddum stað í nokkra klukkutíma og meðal annars splæst á aðra gesti.

Þegar lögregla hafði safnað nægjum sönnunargögnum í málinu fóru fulltrúar hennar á hótel mannsins og handtóku hann.

Í frétt Canarian Weekly kemur fram að maðurinn eigi yfir höfði sér 6 til 12 mánaða fangelsi.