Mánuðum saman höfðu rússneskir tölvuþrjótar aðgang að tölvukerfum stærsta úkraínska símafélagsins. Fyrir þremur vikum var gerð tölvuárás á Kyivstar, sem er umrætt símafélag, og komu mikil vandamál upp í rekstri farsímakerfisins í kjölfarið.

Illia Vitjuk, yfirmaður leyniþjónustunnar SBU, sagði í gær hluti af tölvukerfi símafélagsins hafi verið eyðilagður í árásinni og því hafi fyrirtækið þurft að loka farsímakerfi sínum til að „takmarka aðgang óvinarins“.

Hann sagði jafnframt að rússnesku þrjótarnir hafi verið búnir að hreiðra um sig í tölvukerfinu mörgum mánuðum áður, eða í maí 2023 og jafnvel enn fyrr.

Hann sagði að árásin væri „alvarleg aðvörun“ til Úkraínu og Vesturlanda því þrjótarnir hafi getað ráðist á fyrirtæki sem hafi fjárfest mikið í öryggismálum.

Um 24 milljónir símnotenda misstu farsímasambandið í nokkra daga þegar símakerfinu var lokað.

Reuters hefur eftir Vitjuk að mikið tjón hafi verið unnið í árásinni sem hafi verið ætlað að hafa sálfræðileg áhrif á Úkraínumenn og um leið afla upplýsinga sem gætu gagnast Rússum.