Úkraínumenn gerðu drónaárás á rússnesku borgina Belgorod í nótt. Þetta segir héraðsstjórinn í samnefndu héraði. Hann segir einnig að rússneskar loftvarnarsveitir hafi skotið marga dróna niður.

Belgorod er nærri úkraínsku landamærunum og gerðu Úkraínumenn loftárás á borgina fyrir nokkrum dögum. Segja rússnesk yfirvöld að þá hafi 25 fallið. Sú árás Úkraínumanna var gerð í kjölfar harðra loftárása Rússa á nokkrar úkraínskar borgir.  Létust 39 í þeim árásum.

Í gær létust 4 og 92 særðust í árásum Rússa á Úkraínu.

Vladímír Pútín, Rússlandsforseti, sagði á mánudaginn að Rússar muni herða árásir sínar á Úkraínu sem svar við árásum á Belgorod. „Við munum herða árásirnar. Engin brot gegn mannréttindum verða látin óátalin,“ sagði forsetinn við það tækifæri.