Greint var frá því skömmu fyrir jól að World Class hefði fengið samþykkt kauptilboð í fasteignina með fyrirvara um að byggingarleyfi fengist til að stækka hana umtalsvert.
Húsnæðið sem um ræðir er í eigu Arnarnesvogs ehf. sem leigði veitingareksturinn til Gourmet ehf., sem var í eigu Stefáns Magnússonar sem kom einnig að rekstri Reykjavík Meat og Mathúsi Garðabæjar. Gourmet ehf. var tekið til gjaldþrotaskipta í byrjun október og var veitingastaðnum lokað 2. október.
Bjössi ræðir áætlanir sínar í viðtali við Morgunblaðið í dag þar sem hann segir að stefnt sé að því að stækka húsið svo það rúmi líkamsræktarstöð í hæsta gæðaflokki. Áfram verði rekinn veitingastaður í húsinu og starfsemin víkkuð út.
Björn segir að austan megin við húsið vilji World Class reisa viðbyggingu með 450 fermetra gólffleti, 150 fermetra „infrared“ hóptímasal og búningsklefa í kjallara en tækjasal á jarðhæð.
„Í norðaustur-endanum sjáum við fyrir okkur heitan pott og gufuklefa með útsýni yfir voginn og þá munum við freista þess að fá leyfi til að gera göng undir göngustíginn sem tengja myndi búningsklefana við heitan pott sem yrði á flotbryggju. Myndi sá pottur vera öllum opinn, jafnt viðskiptavinum líkamsræktarstöðvarinnar sem útivistarfólki sem sækir þetta svæði – fólk gæti jafnvel róið til okkar á kajak,“ segir Bjössi við Morgunblaðið.
Björn segir að World Class eigi í viðræðum við veitingamenn sem gætu hugsað sér að koma að verkefninu. Hugsar hann að veitingastarfsemin yrði í nokkuð óbreyttri mynd.
Björn segir að verkefnið muni kosta um 1,2 til 1,3 milljarða og gætu framkvæmdir hafist í febrúar á næsta ári, jafnvel fyrr ef allir leggjast á eitt.
