„Ég verð oft svo sár og reið þegar ég hugsa til alls þess sem mamma hefði getað gert núna ef hún hefði fengið að prófa Tysabri!“ segir Þórey Bjarnadóttir í aðsendri grein í Morgunblaðinu í dag. Móðir Þóreyjar er með MS-sjúkdóminn sem rænir hana nær öllum lífsgæðum. Segir Þórey góðan möguleika á því að Tysabri-lyfið hefði getað hægt mjög á framgangi sjúkdómsins en taugalæknar á Landspítalanum lögðust gegn notkun hennar á því:
„Taugalæknirinn hennar, Sverrir Bergmann, lagði mikla áherslu á að hún fengi þetta lyf fyrir 20 árum. Svör taugalæknanna á Landspítalanum voru þau að lyfið væri of dýrt, mamma of gömul (45 ára) og einhverjar líkur væru á ofnæmisviðbrögðum, m.a. heilabólgu. En hverju hafði mamma að tapa? Engu – en allt að vinna ef lyfið hentaði henni! Ég veit að Tysabri hentar ekki öllum, en mamma fékk ekki einu sinni tækifæri á að prófa hvort þetta væri eitthvað fyrir hana heldur fær hún ný lyf eftir því sem sjúkdómurinn gengur lengra með tilheyrandi aukaverkunum,“ skrifar Þórey.
Hún bendir á að mikill kostnaður skapist við framgöngu MS-sjúkdómsins í lyfjakaupum og kaupum á hjálpartækjum ef sjúklingur fær ekki lyfið Tysabri. Þó lyfið sé dýrt þá hægir það svo mikið á sjúkdómnum að það gerir kaup á ýmsum öðrum lyfjum og tækjum óþörf.
„…þanng að á endanum er ódýrara að gefa sjúklingum hið kostnaðarsama lyf sem hægir á framgöngu sjúkdómsins og einstaklingurinn því virkari í samfélaginu. Er það ekki það sem við viljum; virka einstaklinga í samfélaginu sem geta lagt eitthvað til? Sem geta lifað lífinu eins og aðrir?“