Karlmaður ákvað að gera sér glaðan dag, eða gott kvöld, í gær og skellti sér á næturlífið í miðbænum. Þar rakst hann á tvær konur og fór með þeim heim, en greint er frá málinu í dagbók lögreglunnar. Skyndilega tók nóttin á sig aðra mynd þegar konurnar tjáðu manninum að þær væru í raun vændiskonur og vildu að hann borgaði fyrir þjónustu þeirra. Það var maðurinn ekki tilbúinn að gera. Þá tóku konurnar upp vopn, hótuðu manninum og höfðu af honum fjármuni. Maðurinn hringdi á lögreglu eftir atvikið sem hefur málið til rannsóknar en ekki mun liggja fyrir að svo stöddu hverjar umræddar konur eru, en málið er rannsakað sem rán.
Eins var óskað eftir aðstoð lögreglu vegna aðila sem var til ama í miðbænum en hann er sagður hafa brotið rúðu og ráðist á fólk. Lögreglan handtók manninn og er málið til rannsóknar. Eins var tilkynnt um eignaspjöll á rútum þar sem fjöldi rúða hafði verið brotinn og er tjónið talið hlaupa á milljónum króna. Svo var tilkynnt um þjófnað úr verslun og innbrot í gáma þar sem skóm var stolið.
