Næstkomandi föstudag verður aðalmeðferð við Héraðsdóm Reykjaness í máli manns sem héraðssaksóknari hefur ákært fyrir kynferðisbrot gegn barni og stórfellt brot í nánu sambandi.
Maðurinn er sakaður um að hafa á sameiginlegu heimili sínu og stúlkunnar sem í hlut á, „með ólögmætri nauðung misnotað freklega yfirburðarstöðu sína gegn“ henni, „traust hennar og trúnað“. Hann hafi á alvarlegan hátt ógnað heilsu og velferð hennar og „haft við hana önnur kynferðismök en samræði með því að stinga fingri í leggöng og endaþarm hennar.“
Þess er krafist að maðurinn verði dæmdur til refsingar og greiðslu alls sakarkostnaðar.
Fyrir hönd stúlkunnar, sem er ólögráða þolandi í málinu, er gerð krafa um miskabætur upp á fjórar milljónir króna.
Búast má við að dómur falli í málinu innan fjögurra vikna.