Sinan Ogan, sem fékk þriðju flest atkvæðin í fyrri umferð tyrknesku forsetakosninganna þann 14. maí, hefur lýst yfir stuðningi við sitjandi forseta, Recep Tayyip Erdogan, í seinni umferð kosninganna þann 28. maí næstkomandi þar sem kosið verður á milli forsetans og helsta andstæðings hans, Kemal Kilicdaroglu.

Ogan hlaut 5,17% atkvæða í kosningum en hann var nánast óþekktur fyrir þær í Tyrklandi og vakti árangurinn því nokkra athygli. Erdogan hlaut hins vegar flest atkvæði, 49,52 prósent, rúmum fimm prósentustigum fleiri atkvæði en Kilicdaroglu hlaut.

Í yfirlýsingu sagði Ogan að hann lýsti yfir stuðningi sínum við Erdogan og hvatti alla kjósendur sína til þess að flykkjast á bak við forsetann og tryggja honum áframhaldandi setu í valdastóli.

Sagði Ogan að ákvörðunin hafi verið tekin af vel athuguðu máli og að hún væri tekin með hagsmuni þjóðarinnar og Tyrklands í huga.

„Lýðveldisflokknum hefur mistekst að sannfæra okkur,“ sagði Ogan en Kilicdaroglu er leiðtogi flokksins sem er langstærsti stjórnarandstöðuflokkur landsins.

Sagði Ogan að Tyrklandi væri á mikilvægum tímamótum og hann treysti Erdogan best til að leysa úr þeim vandamálum. Lagði hann áherslu á að leysa þyrfti úr málefnum innflytjenda, taka á þeirri öryggisógn sem jarðskjálftar eru í Tyrklandi, rífa þyrfti upp efnahag landsins og taka á við hryðjuverkaógn sem hann segir steðja að Tyrkjum.

„Allir eiga rétt á að láta til sín taka í pólitík en við verðum að tryggja að pólitískum örmum hryðjuverkasamtaka verði hent úr tyrkneskri pólitík,“ sagði Ogan, sem tilheyrir stjórnmálasamtökum sem eru afar langt til hægri.

Kilicdaroglu gaf lítið fyrir stuðningsyfirlýsingu Ogan við Erdogan og hvatti tyrknesk ungmenni og alla þá átta milljónir Tyrki sem ekki kusu í fyrra hlutanum til þess að flykkjast á kjörstað og tryggja að Erdogan yrði að víkja.