Miðvikudaginn 17. maí var þingfest í Héraðsdómi Reykjaness mál sem héraðssaksóknari hefur höfðað á hendur tveimur karlmönnum. Þeir eru ákærðir fyrir að hafa nauðgað komu í samverknaði á heimili annars þeirra. Einnig eru mennirnir sakaðir um að hafa þvingað konuna til að taka inn kókaín.
Meintu broti er lýst þannig í ákæru:
„…með ofbeldi og ólögmætri nauðung, í félagi haft önnur kynferðismök en samræði við A, kt. 000000-0000, án hennar samþykkis, en ákærði X kleip í handlegg A, hélt höndum hennar föstum og reif endurtekið í hár hennar og tók hana hálstaki, og ákærðu báðir settu fingur sína upp í munn hennar og settu getnaðarlimi sína inn í munn hennar og þvinguðu hana til að hafa við þá munnmök og meðan á þessu stóð þukluðu ákærðu báðir á brjóstum hennar innanklæða og kynfærum hennar utanklæða, og þvinguðu hana til að taka kókaín, allt með þeim afleiðingum að A hlaut þreifieymsli í hársverði og yfir vöðvum á hálsi beggja vegna og marbletti á vinstri upphandlegg.“
Héraðssaksóknari krefst þess að mennirnir verði dæmdir til refsingar og greiðslu alls sakarkostnaðar.
Gerð er einkaréttarkrafa á hendur mönnunum þar sem konan krefst miskabóta að fjárhæð fjórar milljónir króna.