Skipulag Orkureitsins hefur hlotið BREEAM Communities vottun með framúrskarandi einkunn (Excellent). SAFÍR byggingar, sem keypti byggingarheimildir á reitnum 2022, byggir nú 440 íbúðir og um 2 þúsund m2 atvinnuhúsnæðis á reitnum. Orkureiturinn er skipulagður og hannaður með sjálfbærni og vistvæn sjónarmið að leiðarljósi og er fyrsta BREEAM vottaða hverfið í Reykjavík. BREEAM Communities er alþjóðlega viðurkenndur breskur vistvottunarstaðall fyrir skipulagsgerð, þar sem þriðji aðili vottar skipulagið með tilliti til umhverfislegra, félagslegra og efnahagslegra gæða, eins og segir í tilkynningu.Skipulag reitsins gerir ráð fyrir skjólgóðum inngörðum sem eru að hluta til opnir og vel tengdir aðliggjandi svæðum. Borgarlínustöð er áformuð framan við lóðina við Suðurlandsbraut og góðir göngu- og hjólastígar tengjast skipulagsvæðinu. Hugað hefur verið að aðlögun að loftslagsbreytingum og mikið er lagt upp úr gæðum opinna svæða, til dæmis með blágrænum innviðum, endurnýtingu byggingarefna og góðri lýsingu. Loftræstisamstæða verður fyrir hverja íbúð sem tryggir bætt loftgæði og endurnýtingu varma. Iðnaðarhúsnæði að Ármúla 31 og bakhús á miðri lóðinni munu víkja fyrir 3-6 hæða byggingum í borgarmiðuðu skipulagi. Gamla Rafmagnsveituhúsið verður endurnýjað og heldur sínum virðingarsess á lóðinni.„Vottunin er gæðastimpill á skipulagið, byggðina og ekki síst það samfélag sem mun verða til á Orkureitnum. Við erum afar stolt af því að hafa hlotið framúrskarandi einkunn frá BREEAM og hlökkum til að kynna nánar fyrir verðandi íbúum með hvaða hætti slík vottun getur haft jákvæð áhrif á lífsgæði og daglegt líf íbúa,“ segir Hilmar Ágústsson, framkvæmdastjóri SAFÍR bygginga ehf, sem er framkvæmdaaðili uppbyggingar á Orkureitnum.Gert ráð fyrir að fyrstu íbúar flytji inn 2024SAFÍR byggingar ehf. hefur þegar hafið framkvæmdir við fyrsta áfanga svæðisins og gert er ráð fyrir að fyrstu íbúar flytji inn á Orkureitinn haustið 2024. Reitir fasteignafélag, eigandi gamla Rafmagnsveituhússins og fyrrum eigandi reitsins, sá um öflun vottunarinnar og skipulag svæðisins á árunum 2018-2022 í samvinnu við skipulagsfulltrúa Reykjavíkur. Skipulagshöfundar eru Alark arkitektar. VSÓ ráðgjöf sá um verkefnastjórnun, verkfræðihönnun, byggðatækni og umhverfismál. Landslag sér um landslagshönnun og ráðgjöf því tengdu á skipulagsstigi. Mannvit er úttektaraðili vegna BREEAM Communities vottunarinnar. Einnig kom Náttúrufræðistofa Kópavogs og Efla að vinnu varðandi skipulagið og BREEAM vottuninni.
