„Þetta er mikill harmleikur.“
Starfsmanni í skólabúðunum á Reykjum hefur verið sagt upp störfum í kjölfar atviks sem átti sér stað í kennslustund. Frá þessu greinir Vísir
Hefur fréttastofa Vísis heimildir fyrir því að í kennslustundinni hafi börnum verið kennt að vinna sér mein og lýst svo hvernig tilfinning fylgi því að deyja. Eins hafi verið fjallað um valdaójafnvægi milli kynjanna og sagði kennarinn að tími væri kominn til að leiðrétta það og ættu stúlkurnar í kennslustundinni að ráðast á drengina.
Sigurður Guðmundsson, forstöðumaður skólabúðanna sem eru reknar af Ungmennafélagi Íslands (UMFÍ) sagði í samtali við Vísi að atvikið hafi átt sér stað í síðustu viku, en umræddur starfsmaður hafi starfað við búðirnar síðan UMFÍ tók við rekstri þeirra síðasta haust. Sagði Sigurður að umrædd kennslustund hafi ekki verið í samræmi við kennsluáætlun búðanna. Umræddur kennari er fullorðinn karlmaður og voru um þrjátíu börn í kennslustundinni.
Hefur öllum grunnskólum sem senda börn í búðirnar verið send tilkynning vegna málsins og segir Sigurður að litið sé á málið með alvarlegum augum.
„Þetta er mikill harmleikur.“