Úkraínumönnum hefur gengið mjög vel að valda Rússum tjóni með ómönnuðum fljúgandi drónum. En þeir leggja ekki allt undir á fljúgandi dróna því neðansjávardrónar eru einnig inni í myndinni hjá þeim.
Í síðustu viku notuðu þeir þrjá slíka dróna til að reyna að valda tjóni á Svartahafsflota Rússa í Sevastopol á Krím. Rússum tókst að verjast árásinni en þetta var örugglega ekki í síðasta sinn sem þeir þurftu að verjast árás af þessu tagi því Úkraínumenn virðast vera að koma sér upp stórum flota af drónum af þessu tagi.
Anders Puck Nielsen, hernaðarsérfræðingur hjá danska varnarmálaskólanum og sjóliðsforingi, sagði í samtali við Jótlandspóstinn að drónum af þessu tagi sé stýrt í gegnum Internetið og það sé hægt að fylla þá af eldsneyti. Hann sagðist telja að markmiðið með notkun dróna af þessu tagi sé að hæfa og sökkva rússneskum herskipum en þeir séu ekki orðnir nógu góðir til þess að það gangi upp. Þeir hafi því takmarkað gildi fyrir gang stríðsins enn sem komið er en margt bendi til að Úkraínumenn vinni að þróun þeirra.
Breska varnarmálaráðuneytið segir að þrátt fyrir að Úkraínumönnum hafi ekki tekist að valda Rússum tjóni í síðustu viku þá stafi Rússum ógn af úkraínskum drónum og að úkraínski herinn muni mjög líklega gera nýjar drónaárásir á rússneska flotann í Svartahafi.