„Eitt er að koma fólki á flótta í skjól og veita nauðsynlega þjónustu og við erum öll sammála um mikilvægi þess. En það skýtur skökku við að þar séu börn undanskilin. Við vitum öll sem viljum vita að álagið í leik- og grunnskólum er mikið fyrir. Leikskólar glíma við hinn sígilda mönnunarvanda og grunnskólarnir eru sveltir af því fagfólki sem þarf til þess að mæta þeim fjölbreytileika sem tilheyrir skólakerfi sem ætlað er fyrir öll,“ segir Sara Dögg Svanhildardóttir bæjarfulltrúi Viðreisnar í Garðabæ í pistli á Vísi.
Sara Dögg fer yfir samning ríkisins um móttöku flóttafólks sem sveitarfélögum ber nú að taka afstöðu til, samninginn skorti stuðning við börn í leik- og grunnskólum. „Barna- og menntamálaráðherra virðist ekki hafa gert sér það í hugarlund að þessi stuðningur við þau börn væri sérstaklega mikilvægur. Það væri amk ekki mikilvægt að koma að málum hratt og örugglega. Í stað þess að tryggja strax sérstakan stuðning við börn sem hafa verið á flótta, leggur hann til tímabundin tilraunaverkefni fyrir sum sveitarfélög og athuganir, sem mun tefja fyrir þeim stuðningi sem börnin þurfa strax,“ segir Sara Dögg.
Segist hún velta þessu fyrir sér þar barnamálaráðherra hefur haft svo hátt um betri þjónustu við börn. „Öll börn. Því finnst mér hljóð og mynd ekki fara saman. Það fer ekki saman ómurinn úr barnamálaráðuneytinu um að gera best fyrir öll börn, ópið sem berst frá skólasamfélaginu um að kerfið okkar sé að kikna undan álagi og kallið eftir stuðningi einmitt til þess að geta gert það allra besta fyrir öll börn. Líka flóttabörnin okkar sem barnamálaráðherra er þögull um.“
Segir Sara Dögg samninginn um margt ágætan, en hann lagðan fyrir sveitarfélög án samtals um hvað ætti að vera í samningnum. Segir hún fyrirkomulagið hafa staðið aðeins í meirihlutanum í Garðabæ þrátt fyrir að nú búi um 130 flóttamenn í sveitarfélaginu. Nú sé hins vegar komið að undirritun og því fagni Viðreisn.
Sara Dögg segir að það ætti að vera öllum ljóst að „ef það skiptir máli að hlúa vel að börnum þá skiptir það gríðarlega miklu máli að hlúa vel að aðlögun barna á flótta. Búa svo um að hvergi beri skugga á. Börn á flótta eru svo óendanlega varnarlaus og verða af svo dýrmætu og mikilvægu jafnvægi í uppvexti. Öryggi, húsaskjól og menntun er eitthvað sem okkur þykir mikilvægt að bjóða börnum upp á í okkar samfélagi.“
