Stafræna markaðsstofan Sahara hlaut í síðustu viku hin eftirsóttu verðlaun US Agency Awards í Bandaríkjunum. US Agency Awards heiðra stafrænar auglýsingastofur sem hafa náð framúrskarandi árangri á sviði framleiðslu, hönnunar, stafrænna auglýsingaherferða og fleiri markaðslegra þátta.

Verðlaunin snúast ekki um umfang herferða eða stærð auglýsingastofa, heldur er þeim einfaldlega ætlað að fagna frábærum árangri og veita viðurkenningar til þeirra sem skara fram úr í nýsköpun og kreatífri hugsun að sögn Sigurðar Svanssonar, framkvæmdastjóra Sahara.

Í flokknum Social Media Campaign of The Year lenti Sahara í fyrsta sæti með herferðina Keeping London Warm Since 2022 sem unnin var fyrir 66°Norður. Í umsögn dómnefndar segir: „Herferðin er skýrt dæmi um fullkomna blöndu af sköpunargáfu og gagnastýrðri, stafrænni nálgun sem hittir á hárfínt jafnvægi. Teymið skilaði öflugri strategíu og úrvinnsla sögupersóna gegndi lykilhlutverki í að móta efnið. Við kunnum að meta metnaðinn og vinnuna sem lögð var í þessa glæsilegu herferð og óskum teyminu til hamingju með þennan framúrskarandi árangur.“

Sigurður segir það afar ánægjulegt að hafa unnið til þessara verðlauna hjá US Agency Awards. Þau undirstriki enn frekar að stofan sé á réttri vegferð því aðeins eru nokkrar vikur síðan Sahara hlaut tvenn verðlaun á Global Digital Excellence Awards.

„Starfsfólkið okkar vann hörðum höndum að þessu verkefni og þessi viðurkenning staðfestir hvað við erum með frábært teymi innanhús sem sýnir enn og aftur að það er sterkt á erlendum jafnt sem innlendum markaði. Það sem gerir þennan sigur svo enn sætari er að við opnuðum fyrir stuttu útibú í Bandaríkjunum þar sem við ætlum að láta að okkur kveða með tíð og tíma og verðlaun sem þessi eru góð lyftistöng fyrir inngöngu okkar á þann markað.“