45 ára maður frá Túnis myrti tvo Svía í Brussel á mánudagskvöldið. Hann var síðan skotinn til bana af belgísku lögreglunni. Rannsókn málsins hefur leitt í ljós að maðurinn virðist hafa ferðast vítt og breitt um Evrópu árum saman og hafi notað hin ýmsu nöfn á þessum tíma. Auk þess höfðu sjónir sænsku og belgísku lögreglunnar beinst að manninum.

Eins og áður sagði var maðurinn frá Túnis. Þar hafði hann hlotið dóma fyrir líkamsárás og ofbeldisverk.

Samkvæmt heimildum innan ítalska stjórnkerfisins flúði maðurinn frá Túnis til Ítalíu 2011 og eftir það notaðist hann við hin ýmsu nöfn á ferð sinni um fjölda Evrópuríkja.

Í Belgíu var hann grunaður um að stunda mansal og hafði komið við sögu hjá lögreglunni að sögn BBC. Lögreglan ætlaði að handataka hann og yfirheyra í september en tókst ekki að finna hann.

Lögreglan hafði ekki tengt hann við öfgahyggju áður en hann myrti Svíana á götu úti og særði þann þriðja.

Yfirvöld segja að svo virðist sem mennirnir hafi verið myrtir af þeirri ástæðu einni að þeir voru sænskir.