Maður var á dögunum úrskurðaður í gæsluvarðhald og einangrun vegna gruns um peningaþvætti eftir að rúmlega 9000 þúsund evrur, eða andvirði um 1,4 milljóna íslenskra króna, fundust í bakpoka hans við skoðun tollvarða og lögreglumanna í Flugstöð Leifs Eiríkssonar þann 20. janúar síðastliðinn.

Maðurinn var í héraðsdómi úrskurðaður í gæsluvarðhald til 27. janúar (þ.e. til síðasta föstudags) og til að sæta einangrun, en Landsréttur staðfesti úrskurðinn á miðvikudag í síðustu viku og birtist sá úrskurður á vef dómstólanna í dag.

Samfarþegar mannsins, kona og maður, voru einnig til skoðunar hjá tollvörðum og lögreglu, en töluvert magn af seðlum fannst í fórum þeirra. Fólkið gat ekki gefið fullnægjandi skýringar á því  hvers vegna þau höfðu þetta reiðufé undir höndum og eru þau grunuð um peningaþvætti.

Maðurinn sem var úrskurðaður í gæsluvarðhald á nýleg ólokin mál hjá lögreglu þar sem hann er grunaður um sölu fíkniefna og peningaþvætti í desember síðastliðnum. Talið er að maðurinn geti torveldað rannsókn málsins ef hann gengur laus, meðal annars með samskiptum við meðákærða fólkið. Einnig sé hætta á að hann verði beittur þrýstingi af hálfu mögulegra samverkamanna. Í gæsluvarðhaldsúrskurðinum segir meðal annars:

„Varnaraðili sem kom til landsins í nóvember sl. er með opin mál hjá lögreglu en tvívegis hefur lögregla haft afskipti af honum vegna gruns um fíkniefnasölu og
peningaþvætti og eru þau mál til rannsóknar. Varnaraðili hefur í yfirheyrslu lögreglu ekki getað gefið trúverðugar skýringar á því hvaðan þeir fjármunir, 9055 evrur, sem hann hafði meðferðis við handtöku hafi komið. Í ljósi tengsla allra þessara aðila er samkvæmt framansögðu og fyrirliggjandi rannsóknargögnum málsins að mati dómsins ljóst að varnaraðili er undir rökstuddum grun um að hafa gerst sekur um háttsemi sem fangelsisrefsing er lögð við.“

Sjá nánar hér.