Í síðustu viku gerðu Úkraínumenn drónaárás á flugvöll í Pskov í Rússlandi. Tókst þeim að eyðileggja tvær IL-76 flutningavélar og skemma tvær til viðbótar. Árásin vakti mikla athygli því flugvöllurinn er um 700 km frá úkraínsku landamærunum.

Á föstudaginn sagði Kyrylo Budanov, yfirmaður úkraínsku leyniþjónustunnar, að árásin hafi verið gerð frá Rússlandi. Drónarnir hafi verið sendir á loft frá Rússlandi en ekki Úkraínu.

Hann sagði að flugvélarnar hafi verið notaðar til að flytja rússneska hermenn og hergögn.

Rússnesk yfirvöld sögðu í síðustu viku að sérfræðingar væru að rannsaka hvaða leið drónarnir hafi flogið til að geta komið í veg fyrir að árás af þessu tagi endurtaki sig.