Enn á ný hefur glæsiverkefni Vladímír Pútíns, Rússlandsforseta, orðið fyrir tjóni. Þetta er brúin sem tengir Krím við meginland Rússlands. Í gær urðu miklar sprengingar á brúnni og í gærkvöldi viðurkenndi Pútín að hún væri mikið skemmd.

Ganga má að því sem vísu að Úkraínumenn hafi staðið á bak við árásina á brúna í gær. Árásin mun hafa mjög neikvæð áhrif á ferðamannaiðnaðinn á Krím en er einnig hernaðarlegt og pólitískt áfall fyrir Pútín og Kremlverja.

Í október síðastliðnum réðust Úkraínumenn á brúna og skemmdu töluvert. Sú árás var mikið áfall fyrir Pútín sem hefur verið óspar á að tengja brúna við sjálfan sig. Um nokkurs konar gæluverkefni hans var að ræða.

Heimildarmenn segja að tvær sprengingar hafi orðið á brúnni um klukkan þrjú aðfaranótt mánudags. Akreinar í báðar áttir skemmdust. Tveir létust og einn særðist.

Ukrainska Pravda sagði í gær að Úkraínumenn hefðu gert drónaárás á brúna. Þeim hafi verið flogið rétt yfir haffletinum og hafi síðan hæft brúna að neðanverðu. Heimildarmaður innan úkraínsku leyniþjónustunnar sagði að árásin hafi verið samstarfsverkefni flotans og leyniþjónustunnar.

Rússar bentu strax á Úkraínumenn og sögðu þá bera ábyrgð á árásinni.

Ferðamannaiðnaðurinn er afgerandi fyrir efnahag Krím og árásin er þungt högg fyrir hann. Krím hefur áratugum saman verið vinsæll áfangastaður bæði úkraínskra og rússneskra ferðamanna. En glansinn hefur farið af Krím sem ferðamannastað á síðustu árum.

Rússar hafa fjárfest mikið í innviðauppbyggingu á Krím eftir að þeir hertóku skagann 2014. Rósin í hnappagatið var þegar brúin var tekin í notkun 2019. Hún er 19 km að lengd og átti að tryggja straum ferðamanna, aðallega frá sunnanverðu Rússlandi, til Krím. 13.000 bílum er að meðaltali ekið yfir brúna daglega en það er langt frá upphaflega markmiðinu sem var 40.000.

Tjónið á brúni mun gera ferðamönnum erfitt fyrir við að komast til og frá Krím og það mun einnig torvelda flutning Rússa á hermönnum og hergögnum í gegnum Krím til hersveita sinna í Úkraínu.