Par um þrítugt var þann 13. júní dæmt í fangelsi vegna hluta sem fundust við húsleit á heimili fólksins. Dómurinn var kveðinn upp í Héraðsdómi Reykjavíkur.
Bæði voru ákærð fyrir stórfellt fíkniefnabrot í kjölfar húsleitar á heimili þeirra í Þórðarsveig í Reykjavík en þar fundust „658,89 g af amfetamíní, 79,71 g og 294 töflur af ecstasy, 56,02 g af hassi, 16,25 g af kannabislaufi, 88,40 g af kókaíni, 110,95 g af maríhúana og 134 stykki af LSD, en fíkniefnin voru ætluð til söludreifingar í ágóðaskyni hér á landi og fundust við leit lögreglu 7. júlí 2020,“ eins og segir í ákæru.
Maðurinn var síðan ákærður fyrir vopnlagabrot fyrir að hafa í Þórðarsveig haft undir höndum hálfsjálfvirka haglabyssu án skotvopnaleyfis og bitvopn með 14 cm hnífsblaði. Ennfremur er maðurinn ákærður fyrir að hafa haft undir höndum mikið magn af anabólískum sterum.
Konan var ákærð fyrir að hafa haft í fórum sínum: „5 töflur af Viagra, 48 belgi af Medikinet Cr, 116 töflur af Alprazolam Krka og 20 töflur af Tradolan, en fíknilyfin fundust við leit lögreglu.“
Bæði konan og maðurinn játuðu brot sín skýlaust fyrir dómi. Maðurinn hefur hlotið þónokkra refsidóma en konan er með hreint sakavottorð.
Maðurinn var dæmdur í 23 mánaða fangelsi en konan í 15 mánuði. Refsing hjá báðum er skilorðsbundin og hefur þar áhrif á fólkið sýndi lögreglu samstarfsvilja og játaði brotin fyrir dómi.
