Þann 23. júní verður þingfest fyrir Héraðsdómi Reykjavíkur mál sem héraðssaksóknari hefur ákært fyrir hættubrot og umferðarlagabrot vegna atvika sem áttu sér stað í Kjós sumarið 2021. Maðurinn sýndi þá af sér mjög ógnandi hegðun á vegum úti, veitti pari eftirför og reyndi að þvinga þau út af veginum. Er þetta orðað svo í ákæru:

„Fyrir hættubrot og umferðarlagabrot, með því að hafa ekið bifreiðinni B, af gerðinni C, án gildra ökuréttinda og á vítaverðan og ógnandi hátt að bifreið, þar sem í voru X og Y, ekið var um Þúfukotsveg í Kjós þar sem ákærði hóf eftirför á eftir þeim sem varði um 10 km langan vegarkafla, allt að Meðalfellslandi og aftur á Þjóðveg 47, en á meðan akstrinum stóð gerði ákærði tilraun til að þvinga þau út af veginum. Með framangreindri háttsemi stofnaði ákærði lífi og heilsu X og Y í augljósan háska á ófyrirleitinn hátt.“

Maðurinn er ennfremur ákærður fyrir að hafa ekki hlýtt fyrirmælum um að stöðva bíl sinn að er lögregla veitti honum eftirför frá Meðalfellsvegi inn á Hvalfjarðarveg „þar sem honum voru gefin merki með forgangsljósum og hljóðmerkjum um að stöðva aksturinn, en ákærði ók þaðan inn á Eyrarfjallsveg, allt uns ákærði stöðvaði bifreiðina við afleggjarann við Þúfukot, þar sem lögregla hafði afskipti af honum,“ eins og segir í ákæru.

Maðurinn er einnig ákærður fyrir vopnalagabrot, fyrir að hafa haft í vörslu sinni hníf með 18 cm löngu hnífsblaði.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Fólkið í bílnum sem hann ógnaði gerir kröfu um miskabætur, þrjár milljónir hvort.

Búast má við því að réttað verði í málinu í haust.