Þjóðverjar eru slegnir óhug eftir hrottalega árás og morð við eitt þekktasta kennileiti landsins, Neuschwanstein-kastala. Þýski miðillinn Bild greinir frá því að bandarískur ferðamaður hafi kynferðislega áreitt tvær konur, sem einnig eru bandarískar, sem voru að skoða kastalann og í kjölfarið hent þeim fram af nærliggjandi brú með þeim afleiðingum að önnur konan lést en hin stórslasaðist.

Árásarmaðurinn, sem er þrítugur að aldri samkvæmt þýska miðlinum, á að hafa flúið af vettvangi en verið að lokum handtekinn.

Umrædd árás átti sér stað á hinni tilkomumiklu Maríu-brú á miðvikudaginn og féllu konurnar tæplega 90 metra ofan í gil sem brúin þverar. Báðar lifðu þær fallið af en yngri konan, sem var 21 árs gömul, lést fljótlega eftir að hún var flutt á nærliggjandi spítala en vinkona hennar, 22 ára, liggur þar með mikla áverka.

Neuschwanstein-kastali, sem sagður er hafa veitt teiknurum Disney innblástur að kastala fyrirtækisins, er einn vinsælasti ferðamannastaður Þýskalands en um 1,4 milljónir manns heimsækja kastalann árlega. Það þykir ómissandi hluti af heimsókninni að ganga yfir Maríubrúnna enda fá ferðamenn þar að upplifa tilkomumikið útsýni yfir kastalann fræga.

Sjónarvottar segja að bandaríski morðinginn hafi fyrst byrjað að áreita yngri konuna á brúnni en þá hafi vinkona hennar komið henni til hjálpar. Þá hafi maðurinn tekið hana hálstaki og hent henni niður gilið og skömmu síðar hafi sú yngri fallið sömu leið.