Meirihluti rússnesku þjóðarinnar styður enn stríðið gegn Úkraínu en samt sem áður virðist sem það gangi ekki vel að fá nýja menn til liðs við herinn og það getur haft alvarlegar afleiðingar.

Þetta sagði Flemming Splidsboel Hansen, sérfræðingur í rússneskum málefnum hjá Dansk Institut for Internationale Studier, í samtali við B.T.

Í Moskvu komast borgarbúar eiginlega ekki hjá því að sjá auglýsingar, þar sem fólk er hvatt til að ganga til liðs við herinn til að verja ættjörðina, því þær eru nær alls staðar. En þessi auglýsingaherferð virðist ekki hafa borið tilætlaðan árangur að sögn Moscow Times.

Bloomberg segir að það hafi verið ætlun Pútíns og samstarfsmanna hans að fá 400.000 manns til liðs við herinn á þessu ári. Í maí sagði Dmitry Medvedev, fyrrum forseti og núverandi varaformaður rússneska öryggisráðsins, að tekist hefði að fá 117.000 manns til liðs við herinn.

Splidsboel Hansen sagði það sína skoðun að Rússar eigi í erfiðleikum með að fá fólk til liðs við herinn. Ráðningarstofur hafi verið settar upp og reynt hafi verið almennt séð að leggja þrýsting á fólk um að ganga til liðs við herinn en það virðist ekki hafa virkað. „Það er einmitt þess vegna sem nú er aftur farið að ræða um hugsanlega herkvaðningu,“ sagði hann.

Hann sagði að þrátt fyrir að það gangi erfiðlega að sigra í stríðinu í Úkraínu þá sé enn mikill almennur stuðningur við stríðið meðal almennings. „En maður vill ekki fara sjálfur í stríð. En það mega aðrir gjarnan gera. Þetta snýst örugglega um að Rússa langar ekki að deyja. Þeir vita vel hvað er í gangi. Stríðið hefur varað í tæpa 16 mánuði og það segir Rússum að eitthvað er að. Að þeir hafi rekist á vegg,“ sagði hann.