Þetta sagði Jacob Kaarsbo, sérfræðingur hjá dönsku hugveitunni Tænketanken Europa og fyrrum sérfræðingur hjá leyniþjónustu danska hersins, í samtali við TV2.
Hann sagði að stórar úkraínskar hersveitir séu í biðstöðu. Enn hafi Úkraínumenn ekki notað bresku Challenger skriðdrekana sína og skriðdrekar frá Þýskalandi og Svíþjóð hafi heldur ekki sést í notkun á vígvellinum.
Hann sagði að það sé meðvituð taktík hjá Úkraínumönnum að geyma svona mikið af vopnum því nú einbeiti þeir sér að kanna hvar rússnesku varnarlínurnar eru veikburða. „Þegar þeir hafa fengið skýra mynd og grípa til aðgerða, þá er mikilvægt að þeir séu enn með mikið af vopnum í bakhöndinni,“ sagði hann.
Kristian Lindhardt, major og hernaðarsérfræðingur við danska varnarmálaskólann, sagði í samtali við TV2 að áætlun Úkraínumanna gangi út á að hrekja Rússa 15-20 km aftur á bak.
Kaarsbo tók undir þetta og sagði að markmið Úkraínumanna sé að komast alla leið að Asóvshafi. Ef þeir komist þangað geti þeir lokað flutningsleiðum Rússa í gegnum Krím og það muni gera Rússum erfitt fyrir við að flytja hersveitir, birgðir og eldsneyti. Hann sagðist telja að þetta sé ekki óraunhæf áætlun og að góðar líkur séu á að hún gangi upp.
