Úkraínumenn hafa um langa hríð verið með hina svonefndu „I Want to Live“ áætlun í gangi en hún beinist að rússneskum hermönnum og er þeim boðið að gefast upp í stað þess að falla á vígvellinum. Margir rússneskir hermenn kjósa frekar að taka eigið líf en að nýta sér þetta.

En það átti ekki við um hermanninn sem sést í myndbandinu hér fyrir neðan. Þegar hann stóð einn eftir innan um fallna félaga sína í skotgröf í austurhluta Úkraínu leit hann biðjandi upp á úkraínskan dróna, sem sveimaði yfir höfði hans, og bar hönd upp að hálsi sér og hristi höfuðið og gaf skýrt til kynna að hann vildi ekki fylgja félögum sínum yfir móðuna miklu.

Hann vildi gefast upp.

Í staðinn fyrir að kasta sprengju niður á hann, kastaði úkraínski drónaflugmaðurinn miða niður með leiðbeiningum um hvernig hann kæmist á öruggan stað.

Honum var sagt að fylgja drónanum eftir og það gerði hann. Sikksakkaði á milli fallinna félaga sinna í skotgröfunum.

Hann tókst síðan þessa hættulegu ferð á hendur og slapp naumlega frá skothríð rússneskra hermanna á leiðinni. Að lokum komst hann á áfangastað og var tekinn höndum af úkraínskum hermönnum.

Myndbandið var tekið upp af úkraínska hernum nýlega í útjaðri Bakhmut. Það var Yuriy Fedorenko, yfirmaður 92. vélvæddu herdeildar úkraínska hersins, sem tók ákvörðun um að lífi rússneska hermannsins skyldi þyrmt og honum komið í skjól. Fedorenko skrifaði á Telegram:

„Mannvirðing er ekki að hegða sér eins og mannæta, heldur að vera manneskja og það á hinum hræðilegustu stundum.“