Fasteignaeigandi einn þarf að greiða 800.000 krónur í stjórnvaldssekt fyrir að hafa leigt íbúð sína út í gegnum bókunarsíðuna Airbnb. Það er Atvinnuvega- og nýsköpunarráðuneytið sem lagði sektina á fasteignaeigandann.

Morgunblaðið skýrir frá þessu og segir að sektin hafi verið lögð á eftir að upp komst um óskráða heimagistingu hjá viðkomandi.

Sýslumaður lagði sekt upp á 1,1 milljón á fasteignaeigandann en hann kærði þá ákvörðun til ráðuneytisins sem lækkaði sektina.

Sýslumaður komst að því að íbúðin hafði verið auglýst á vef Airbnb frá því í júní 2015, hið minnsta. Höfðu 126 ferðamenn gefið henni umsögn.

Hver nótt kostaði 21.000 krónur og þurfti að bóka að lágmarki fjórar nætur í senn.

Sýslumaður ræddi við ferðamann í janúar 2019 sem sagðist hafa leigt íbúðina í fjórar nætur fyrir 84 þúsund krónur.

Í kjölfarið var stjórnvaldssekt lögð á eiganda íbúðarinnar.

Hægt er að lesa nánar um málið í Morgunblaðinu í dag.