Þann 15. apríl síðastliðinn var síðasti dagurinn sem aka má um á nagladekkjum. Þrátt fyrir það mun lögreglan á höfuðborgarsvæðinu ekki byrja að beita sektum fyrr en í maímánuði, eftir því sem fram kom í tilkynningu sem lögreglan birti á Facebook-síðu sinni um helgina.
Sitt sýnist hverjum um þetta og gagnrýndi Svava S. Steinarsdóttir, heilbrigðisfulltrúi hjá heilbrigðiseftirliti Reykjavíkur, lögregluna fyrir að gefa út slíka yfirlýsingu.
„Það sem við höfum gagnrýnt við þetta verklag lögreglunnar er að þó það geti vel verið að einhvers staðar á landinu gætu skapast aðstæður á þessum tíma, þar sem að nagladekk gæti verið talin nauðsynleg, er nú orðið langt síðan slíkar aðstæður voru hér í borginni,“ sagði Svava í samtali við mbl.is í gær og bætti við að nagladekkjanotkun í aðstæðum eins og hafa verið í höfuðborginni að undanförnu ýti undir slit á götum og svifriksmengun.
Pawel Bartoszek, varaborgarfulltrúi Viðreisnar og fyrrverandi forseti borgarstjórnar, gagnrýndi tilkynningu lögreglunnar einnig harðlega á Facebook-síðu sinni um helgina.
„Svona er staðan. Greiðfært á landinu öllu. Hægt að komast milli allra helstu byggðarlaga vandræðalaust. Frá og núna (15. apríl) er bannað að vera á nöglum. Samt var löggan að setja inn tilkynningu á heimasíðuna um að það yrði ekkert gert fyrr en í maí.
Getur lögreglan líka gefið út að skemmtistaðir megi hafa opið allan sólarhringinn? Að ekkert verði aðhafst ef fólk keyrir Reykjanesbrautina á 110?“
Landsmenn virðast skiptast í tvær fylkingar þegar kemur að nagladekkjanotkun. Undir færslu Pawels eru fjölmargar athugasemdir og segir Jack Hrafnkell Daníelsson til dæmis:
„Getur þú ekki skilið jafn einfaldan hlut eins og þá staðreynd að það getur verið hálka og snjókoma á Hellisheiðinni þó það sé sól, bjart og frostlaust í 101 Rvík? Reyndu einu sinni, svona til tilbreytingar að hugsa út fyrir 101 boxið á þér og gerðu þér grein fyrir því að þessi undanþága er vegna þess fjölda fólks sem býr fyrir austan fjall og þarf að sækja vinnu eða þjónustu í borginni. Þú gerir þig bara að fífli með svona jarmi.“
Einn birti svo skjáskot af veðurspá næstu helgar, en um tíma var útlit fyrir frost á nær öllu landinu. Spurði hann Pawel hvort hann ætlaði að setja alla aftur á nagladekk fyrir næstu helgi. Þá blandar landsbyggðarfólk sér í umræðuna og bendir ein á að hún þurfi að aka Möðrudalsöræfin með börnin sín í bílnum og spáin sé ekki beint góð. Engin hætta sé á öðru en að hún verði vel dekkjuð áfram.
Á Twitter hafa ýmsir lagt orð í belg og gerði Gísli Marteinn Baldursson, fyrrverandi borgarfulltrúi Sjálfstæðisflokksins og þáttastjórnandi, viðtal mbl.is við Svövu að umtalsefni. Í viðtalinu sagði Svava að börn sem vaxa upp nálægt umferðarþungum götum geti verið með skerta lungnarýmd af þessum orsökum. Gísli tók undir þetta og sagði:
„Svifryk veldur líka hjartaáföllum og tugum ótímabærra dauðsfalla árlega. En ríkisstjórnin virðist bara sátt við þetta makalausa gerræði löggunnar.“
„Börn sem vaxa upp nálægt umferðarþungum götum geta verið með skerta lungnarýmd af þessum orsökum“
Svifryk veldur líka hjartaáföllum og tugum ótímabærra dauðsfalla árlega. En ríkisstjórnin virðist bara sátt við þetta makalausa gerræði löggunnar.https://t.co/Jx8VEcJ5u2— Gísli Marteinn (@gislimarteinn) April 17, 2023
#14 taktu nagladekkin undan bílnum! Það er vor. Íhugaði svo vandlega hvort þú virkilega þurfir þau næst þegar þú skiptir í vetrardekk. Lang flestir þurfa ekki nagla – kannski er bara allt í lagi að taka strætó /taxa 3x næsta vetur ef færðin verður mjög léleg
— Margrét Rós (@margretros) April 14, 2023
Nagladekk eru eins og öryggisbelti hjólahjálmar -yfirleitt alltaf óþarfi -svo er þetta eina skipti.
Í landi þar sem hitastig sveiflast öðru hvoru megin við 0 allan veturinn og lognið er yfirleitt á hraðferð eru naglar öryggistæki – nema þú farir aldrei austar en Snorrabraut
— Guðmundur Þór (@gudmundurthor) April 15, 2023
