Hann sagði að það geti tekið marga mánuði að ná bænum Bakhmut úr höndum Úkraínumanna en hart hefur verið barist um bæinn mánuðum saman og er hann nánast rústir einar. Rússar vilja gjarnan ná bænum á sitt vald fyrir 24. febrúar, þá verður ár liðið frá upphafi innrásarinnar.
En Prigozhin telur að það gerist ekki og að Rússar nái Bakhmut ekki á sitt vald fyrr en í mars eða apríl: „Til að ná Bakhmut verður að loka á allar birgðaleiðir. Það er stórt verkefni. Þetta mun ekki ganga eins hratt og við viljum gjarnan. Við hefðum getað náð Bakhmut fyrir áramót ef ekki væri fyrir gríðarlega mikið skrifræði rússneska hersins.“
Wagner hefur ekki opinber tengsl við ráðamenn í Kreml en fáum dylst að fyrirtækið vinnur fyrir rússneska ráðamenn sem hafa nýtt sér þjónustu þess víða um heim. Nokkrir fjölmiðlar hafa bent á að vísbendingar séu um að leyniþjónusta rússneska hersins fjármagni starfsemi Wagner og stýri henni að vissu leyti.
En þrátt fyrir tengsl Wagner og rússneskra ráðamanna hefur verið spenna á milli hersins og Wagner.
Prigozhin hefur meðal annars sakað rússneska herinn um að „stela“ sigrum frá Wagner. Það að hann sagði þetta þykir benda til að áhrif hans hafi aukist innan rússneska stjórnkerfisins.
Wagner hefur haldið því fram að málaliðar fyrirtækisins hafi náð árangri á ákveðnum svæðum án aðstoðar rússneska hersins. Það hefur valdið spennu á milli Wagner og hersins.
Wagner tók þátt í hernámi og innlimum Krím í rússneska ríkjasambandið 2014.
