Claus Mathiesen, hernaðarsérfræðingur við danska varnarmálaskólann, sagði í samtali við Jótlandspóstinn að svo virðist sem Rússar séu að gera sömu mistökin og þeir gerðu í upphafi stríðsins.
Hann sagði að flest bendi til að Rússar hafi byrjað sókn sína fyrr en vænst var og við skilyrði sem eru langt frá því að vera ákjósanleg. „Ég sé þetta þannig að Rússar hafi væntanlega vegna pólitísks þrýstings hafið stórsókn fyrr en ég hafði reiknað með,“ sagði hann.
Hann átti von á að stórsókn Rússa í austurhluta Úkraína myndi hefjast í byrjun mars eða um miðjan mars en sagðist telja að vegna pólitísks þrýstings frá æðstu mönnum í Kreml, um að nú verði árangur að nást, hafi sóknin hafist fyrr.
„Þetta tengist einnig hugsanlega þeim hergögnum sem Vesturlönd hafa heitið að senda Úkraínumönnum, að Rússar vilji verða fyrri til. En það er enginn sem hefur hugmyndaflug til að ímynda sér að vestrænir skriðdrekar verði tilbúnir til bardaga í Úkraínu á morgun eða hinn. Það mun taka margar vikur,“ sagði hann.
Öldum saman hafa herir rekið sig á sama vandamálið þegar þeir hafa ætlað að sækja fram yfir lágtliggjandi leirsléttur í Austur-Evrópu. Á hverju vori og hausti myndast aðstæður í Úkraínu þar sem snjór og ís bráðna og í samspili við rigningu gera lágtliggjandi landslag að risastórum leðjupollum.
Mathiesens agði að það hefði verið Rússum meira í hag að bíða lengra fram á vor, þangað til jörðin hefur þornað, áður en þeir hófu sókn. Leðjan geri öllum ökutækjum erfitt fyrir við að komast áfram og svo sé hitastigið allt annað en þægilegt eða hentugt fyrir hermennina til að berjast í.
Hann sagðist einnig undrast þá ákvörðun Rússa að hefja stórsókn á sama tíma og á síðasta ári en það hafi verið talin stór hernaðarmistök af sérfræðingum. Hann sagði að þessi tímasetning sóknarinnar geri að verkum að hætta sé á að stórsóknin renni út í sandinn eða sitji föst í leðju.
