Ungur maður var í dag sakfelldur í Héraðsdómi Reykjaness fyrir að hafa ruðst inn í bíl af gerðinni Subaru Legacy og valdið skemmdum á honum.
Atvikið átti sér stað í janúar árið 2022. Samkvæmt ákæru ruddist maðurinn heimildarlaust inn í bílinn á bílastæði og skemmdi innréttingar á ökumannssvæði, auk þess að skemma útvarpið í bílnum. Tónið nam rúmlega 322.000 krónum.
Annar maður var með í för þegar skemmdarverkið var framið en fallið var frá ákæru gegn honum.
Hinn ákærði játaði sök sína fyrir dómi. Hann er 22 ára gamall og hefur áður verið sakfelldur fyrir líkamsárás og hefur hann rofið skilorð. Í dómnum segir:
„Samkvæmt sakavottorði var hann 15. október 2020 sakfelldur fyrir líkamsárás en ákvörðun refsingar frestað skilorðsbundið í tvö ár. Sá dómur var tekinn upp og dæmdur með dómi 25. janúar 2021 og ákærða gerður hegningarauki, 45 daga fangelsisrefsing, skilorðsbundið tvö ár, fyrir líkamsárás í desember 2018. Með brotum þeim sem ákærði er sakfelldur fyrir í máli þessu rauf hann skilorð síðastgreinds dóms. Ber því nú að taka skilorðsdóminn upp og dæma með máli þessu samkvæmt 60. gr. almennra hegningarlaga. Verður refsing ákærða samkvæmt því tiltekin eftir reglum 77. gr. hegningarlaganna og þykir hæfilega ákveðin fangelsi í þrjá mánuði.“
Hann gekkst við bótaskyldu gagnvart eiganda bílsins en taldi kröfuna of háa. Dómari taldi hins vegar viðgerðarkostnað upp á 322.000 krónu vera rétt metinn.
Niðurstaðan var þriggja mánaða skilorðsbundið fangelsi og bótagreiðslur upp á rétt rúmlega 322 þúsund krónur. Auk þess þarf hann að greiða 130.000 krónur í málskostnað og verjanda sínum rúmlega 210 þúsund krónur.
