Börn konu sem hvarf skammt frá Dyrhólaey, við suðurströnd Íslands, síðla árs 2019, hafa krafist þess að móðir þeirra verði úrskurðuð látin. Stefna málsins var birt í Lögbirtingablaðinu í dag af hálfu dómstjóra Héraðsdóms Suðurlands.
Konan hvarf þann 20. desember árið 2019. Samkvæmt lögregluskýrslu fannst bíll hennar yfirgefinn við Dyrhólavita en einnig liggur fyrir að konan hafi sent móður sinni skilaboð þennan dag með myndskeiði úr farsíma sínum en myndskeiðið er tekið í myrkri svo greina má kletta og heyra brimhljóð. Skilaboðin hljómuðu „fyrirgefið“ á móðurmáli konunnar, sem er erlend, en eiginmaður hann er íslenskur og eiga þau tvö börn á unglingsaldri. Skömmu eftir sendingu skilaboðanna datt síminn út af sendum og má ráða af staðsetningu að síminn hafi þá verið á eða við Dyrhólaey.
Leit hófst að konunni þremur dögum síðar. Leitarhundar röktu spor konunnar frá bílnum og að klettabrún. Ekkert hefur spurst til konunnar né líkamsleifar hennar fundist þrátt fyrir ítrekaða leit á öllu svæðinu frá Ölfusárósum og í Austur-Skaftafellssýslu.
Fjölskylda konunnar sá hana síðast á Hellu þann 20. desember árið 2019.
Málið verður tekið fyrir í Héraðsdómi Suðurlands í lok maí á þessu ári. Fyrir dóm er stefnt hverjum þeim sem kann að hafa upplýsingar um málið að koma fyrir dóm við þingfestingu. Komi ekki fram upplýsingar sem staðfesta að konan sé ekki horfin má vænta þessa að dómur verði kveðinn upp um að hún skuli teljast látin.
