Í dag hefur staðið yfir aðalmeðferð í Héraðsdómi Reykjavíkur í sakamáli sem héraðssaksóknari hefur höfðað á hendur þremur manneskjum vegna meintra skattsvika í rekstri einkahlutafélagsins M S tækjaleiga sem varð gjaldþrota og hefur verið afskráð.
Um er að ræða meint vanskil á virðisaukaskatti og staðgreiðslu opinberra gjalda fyrir rekstrarárin 2017, 2018 og 2019. Nema vanskilin samtals um 34 milljónum króna.
Sérstaka athygli vekur að verjendur tveggja sakborninga í málinu eru hjónin og lögmennirnir Sævar Þór Jónsson og Lárus Sigurður Lárusson. Líklega er einsdæmi í íslenskri réttarsögu að samkynhneigð hjón séu verjendur í sama málinu, í það minnsta hefur DV ekki vitneskju um að slíkt hafi gerst áður. Hvorki Sævar né Lárus vildu tjá sig um þetta þegar eftir var leitað.
DV sat hluta af aðalmeðferð málsins og kom fram að skjólstæðingar Sævars og Lárusar neita sök í málinu. Annars vegar er um að ræða mann sem var í stjórn félagsins og hins vegar konu sem starfaði hjá félaginu. Bera þau bæði við að stjórnunarlegar ákvarðanir hafi verið í höndum framkvæmdastjóra félagsins sem einnig er ákærður.
