Fjölmiðlamaðurinn Sölvi Tryggvason hefur sett allt á fulla ferð að nýju og nú eru ný hlaðvarpsviðtöl aðgengileg í áskrift á heimasíðu hans, Solvitryggva.is.
Í kvöld fóru fjórir viðtalsþættir í loftið en viðmælendur Sölva eru Haraldur Erlends geðlæknir, Sara Odds lögfræðingur og markþjálfi, fjöllistakonan Ellý Ármanns og Númi Snær Katrínarson, einn eigenda líkamsræktarstöðvarinnar Grandi 101.
Þá boðar Sölvi ný viðtöl í hverri viku en framundan eru viðtöl við, meðal annars , við Guðna Ágústsson, Ásdísi Rán, Evu Hauksdóttur, Ögmund Jónasson, Haffa Haff og Nökkva Fjalar svo á einhverja sem minnst.
Sölvi hefur ekki birt nýja hlaðvarpsþætti síðan að ásakanir um kynferðisbrot komu upp á yfirborðið í maí á síðasta ári. Þann 5. maí í fyrra greindi Fréttablaðið svo frá því að tvær konur hefðu leitað til lögreglu vegna meints ofbeldis af hálfu fjölmiðlamannsins. Önnur konan kærði Sölva fyrir líkamsárás og kvað atvikið hafa átt sér stað þann 14. mars 2021 auk þess sem tvær kærur voru lagðar fram á hendur honum. Þá var á lofti hávær kjaftasaga um að Sölvi hefði gengið í skrokk á vændiskonu um svipað leyti í mars.
Í kjölfarið tók fjölmiðlamaðurinn alla þætti sem höfðu litið dagsins ljós úr birtingu og steig út úr sviðsljósinu í rúmt hálft ár.
Í desember í fyrra opnaði Sölvi síðan hina nýju heimasíðu þar sem eldri þættir voru aðgengilegir. Fyrr í sumar greindi svo Mannlíf frá því að kjaftasagan rætna væri á misskilningi byggð og vísaði til upplýsinga frá lögreglu og ónafngreinds lögmanns manns sem átti að hafa framið brotið.
Mál Sölva, og þá ekki síst umrædd kjaftasaga, hratt af stað nýrri #metoo-bylgu en í umfjöllun Mannlífs var fullyrt að upphaf hennar hefði því verið á misskilningi byggð.
