Svona hefst grein í norska Nettavisen þar sem rætt er við föðurinn. „Í deilum foreldra á að hlífa börnunum. Maður á að halda þeim utan við deilurnar. En móðirin tók tvö elstu börnin með sér til Noregs þegar drengirnir voru numdir á brott. Hvað ef eitthvað hefði gerst? Hvað ef lögreglan hefði náð þeim? Þetta er algjörlega fjarstæðukennt,“ er haft eftir föðurnum.
Eins og kunnugt er nam Edda syni sína á brott frá Noregi og flutti til Íslands með einkaflugvél. Hún hefur síðan rætt við fjölmiðla um málið og skýrt frá sinni hlið.
Fram kemur að faðirinn leyni því ekki að hann eigi erfitt og segir blaðamaður greinilegt að það hafi greinilega sett mark sitt á hann að öll börnin hans fimm hafi verið numin á brott í tveimur aðskildum málum og að móðir þeirra, Edda Björk, hafi sett fram alvarlegar ásakanir í hans garð.
Nettavisen fékk aðgang að öllum þeim gögnum sem beðið var um og segir í greininni að faðirinn vilji svara því sem hann telur vera ósannar og órökstuddar ásakanir frá Eddu.
Í greininni er skýrt frá því að Edda hafi verið sakfelld 2020 fyrir að skila börnunum ekki til föðurins eftir frí. Í kjölfarið mátti hún aðeins umgangast syni sína þrjá í 16 klukkustundir á ári og þá undir eftirliti.
Nettavisen segir að brottnámið hafi verið skipulagt um langa hríð en Edda hafi talið það einu leiðina til að börnin fimm gætu búið saman. Barnsfaðir hennar sagði miðlinum að Edda hafi sent honum tölvupóst til að ganga úr skugga um að drengirnir væru í skólanum. Hann segir að Edda, sem sé trúlofuðu efnamanni á Íslandi, hafi leigt einkaflugvél og flogið til Noregs. Tvær eldri systur drengjanna hafi verið með í för. Ætlunin hafi verið að sækja drengina eftir skóla og aka beint út á flugvöll. Það gerði áætlunina erfiðari að yngsti drengurinn var veikur heima þennan dag.
Í viðtali við Eddu, sem var tekið hér á landi, hefur komið fram að hún hafi sent barnsföður sínum tölvupóst til að lokka hann út af heimilinu og hafi það tekist.
Miðillinn ræddi einnig við Eddu sem kom sínum sjónarmiðum á framfæri. Hún sagði meðal annars að drengirnir og stúlkurnar séu hjá henni af fúsum og frjálsum vilja og hafi drengirnir verið mjög hamingjusamir yfir að hitta móður sína og systur á nýjan leik. Aðspurð sagði hún að mjög lítil hætta hafi verið á að lögreglan myndi ná henni áður en hún kæmist úr landi með börnin. „Líkurnar á handtöku voru ekki miklar. Þær voru mjög litlar, því þetta eru börnin mín og þetta var mjög vel skipulagt,“ sagði hún í samtali við Nettavisen.