Í gær var þingfest fyrir Héraðsdómi Reykjaness mál gegn tveimur ungum mönnum sem ákærðir eru fyrir stórfellt fíkniefnalagabrot.

DV hefur ákæru héraðssaksóknara í málinu undir höndum. Mönnunum tveimur er gefið að sök að hafa í félagi staðið að innflutningi á tæplega 1,7 kg af kókaíni hingað til lands frá Finnlandi. Atvikið átti sér stað þann 29. september síðastliðinn. Mennirnir voru með efnin falin í pakkningum innvortis. Pakkningarnar voru samtals 152.

Söluverðmæti efnanna er á bilinu 30 til 40 milljónir króna.

Annar maðurinn býr í Breiðholtinu og er fæddur árið 2002. Hann ber erlent nafn. Hinn maðurinn er lettneskur ríkisborgarri og er aðeins 18 ára gamall, fæddur árið 2004.

Þess er krafist að mennirnir verði dæmdir til refsingar og greiðslu alls sakarkostnaðar.

Réttað verður í málinu á næsta ári.