Víðir Hólm Guðbjartsson, bóndi í Grænuhlíð í Arnarfirði, sakar Votlendissjóð um dýraníð vegna frágangs þeirra á fyllingu skurða á svæðinu. Hann missti á dögunum rollu sem drukknaði í keldu sem myndaðist þegar fyllt hafði verið upp í skurð. Víðir birti myndband á Facebook-síðu sinni þar sem sjá mátti hræ skepnunnar og segir hann að dauðastríð hennar hafi verið átakanlegt. Í samtali við Fréttablaðið segir Víði að Votlendissjóður væri að búa til dauðagildrur fyrir skepnur og menn með frágangi sínum sem væri með hreinum ólíkindum. Rollan hafi drukknað í grunnu vatni eftir að hún hafi fest sig í drullu. Dauði rollunnar hafi því verið dreginn á langinn.
„Þetta er grunnt vatn þarna en það er bara orðið að drullu og hún hefur fest sig þarna og hún hefur líklegast verið í einhvern sólarhring að veslast og drepast. Hún hefur verið búin að krókna úr kulda. Þetta er hreint og klárt dýraníð,“ segir hann.
Hann fordæmir Votlendissjóð fyrir að girða svæðið ekki af og vill meina að sjóðurinn geri honum næstum því ókleift að búa áfram á Grænuhlíð en rollan drapst á nærliggjandi jörð sem Víðir hefur leyfi til þess að nota sem beitiland.
Einar Bárðarson, framkvæmdastjóri Votlendissjóðs, segir það miður hvernig þarna fór en þó verði að halda til haga umrædd framkvæmd var gerð að beiðni landeiganda svæðisins og með samningi við þau. Þá segir hann ekki vera áhættulaust að láta sauðfé ganga laust á Íslandi. „Áður var þarna skurðakerfi upp á 7 kílómetra sem var ekki hættulaust fyrir sauðfé,“ segir Einar.
Nánar er fjallað um málið á vef Fréttablaðsins
