Karlmaður var þann 15. nóvember síðastliðinn dæmdur í 60 daga skilyrðisbundið fangelsi í Héraðsdómi Reykjavíkur fyrir að beita fyrrverandi kærustu sína og barnsmóður ofbeldi.

Maðurinn var ákærður fyrir að hafa, þann 22. júní árið 2021, veist með ofbeldi að konunni. Hann reif upp hurðina ökumannsmegin á bíl konunnar þar sem hún sat undir stýri, sparkaði í líkama hennar og sló hana ítrekað með krepptum hnefa, þar á meðal í höfuð og andlit. Því næst reif hann í hár hennar og reyndi að draga hana út úr bifreiðinni. Afleiðingar árásarinnar voru þær að konan hlaut mar á enni vinstra megin og á hnakka, mar á vinstra hné, eymsli yfir hálsvöðvum og sjalvöðva vinstra megin og bólgu fremst á vinstri löngutöng.

Í dómnum kemur fram að maðurinn hafi játað brot sín skýlaust. Samkvæmt sakarvottorði mannsins hefur hann ekki áður sætt refsingu fyrir ofbeldisbrot og var litið til þess við ákvörðun refsingar hans. Þá var einnig litið til grófleika háttsemi mannsins en konan hlaut líkamlega áverka, þó þeir hafi ekki reynst alvarlegir, auk þess sem hún gat sér enga björg veitt þar sem hún var föst í öryggisbelti bílsins. Einnig er talað um ástæður sem maðurinn hafði tiltekið sem hvata árásarinnar en að mati dómsins réttlæta ástæðurnar ekki árásina.