Lögreglan á höfuðborgarsvæðinu óskar enn eftir vitnum að umferðarslysi sem varð á gatnamótum Kringlumýrarbrautar og Háaleitisbrautar í Reykjavík á föstudagsmorgun. Tilkynning um slysið barst klukkan 09:39.
Þar var bifreið ekið norður Kringlumýrarbraut, á hægri akrein, og hafnaði bifreiðin á gangandi vegfaranda sem ætlaði að ganga yfir gatnamótin til vesturs. Vegfarandinn var í kjölfarið fluttur mjög alvarlega slasaður á slysadeild og lokað var fyrir umferð norður Kringlumýrarbraut frá Háaleitisbraut meðan unnið var á vettvangi.
Lögreglan óskar sérstaklega eftir að ná tali af ökumanni hvítrar bifreiðar, sem líklega er af gerðinni Volkswagen, sem í aðdraganda slyssins ók samsíða bifreiðinni sem hafnaði á vegfarandanum, en var komin fram fyrir bifreiðina rétt áður en slysið varð. Ökumaður hvítu bifreiðarinnar er beðinn um að hafa samband við lögreglu sem og önnur sem urðu vitni að slysinu.
Hægt er að hafa samband við lögreglu í síma 444-1000 en einnig má senda upplýsingar í tölvupósti á netfangið arni.petur@lrh.is.