Kjörbréfanefnd landsfundar Sjálfstæðisflokksins hefur sent frá sér yfirlýsingu vegna gagnrýni Unnar Berglindar Friðriksdóttur, formanns Sjálfstæðisfélagsins í Kópavogi, í garð nefndarinnar. Í yfirlýsingunni er hún sögð hafa vegið ómaklega að starfsfólki flokksins.
Þetta kemur fram á vef Fréttablaðsins.
Eins og DV greindi frá fyrr í dag segist Unnur hafa fengið hótunarsímtöl frá mönnum innan Sjálfstæðisflokksins, meðal annars frá Jóni Gunnarssyni dómsmálaráðherra, í tengslum við formannskjörið á Landsfundi Sjálfstæðisflokksins um næstu helgi. Unnur styður Guðlaug Þór í formannskjörinu.
„Ég er sjálfstæðiskona og hef alltaf verið sjálfstæðiskona. Ég trúi á lýðræði, frelsi og einstaklinginn. En undanfarnir dagar hafa verið mínu sjálfstæðishjarta erfiðir og þau vinnubrögð sem viðhöfð eru í mínum flokki hafa gengið fram af mér,“ sagði Unnur í Facebook-færslu um málið.
Í færslunni segist Unnur vera að vísa til vinnubragða stuðningsmanna annars frambjóðandans og starfsmanna Valhallar sem koma henni fyrir sjónir sem „strengjabrúður þess frambjóðanda“ en frambjóðandinn sem um er að ræða er Bjarni Benediktsson, formaður Sjálfstæðisflokksins. Í samtali við DV sagði Unnur að Jón Gunnarsson dómsmálaráðherra hefði verið með dómsdagsspár varðandi það hvað tæki við ef Guðlaugur Þór næði kjöri sem formaður flokksins. Unnur segist hafa verið boðuð til yfirheyrslu í Valhöll og hún sökuð þar um svindl í tengslum við val á landsfundarfulltrúum.
Í yfirlýsingu kjörbréfanefndarinnar er ásökunum Unnar vísað á bug og sagt að hún vegi ómaklega að starfsfólki Sjálfstæðisflokksins. Í yfirlýsingunni segir meðal annars:
„Í færslu formanns Sjálfstæðisfélags Kópavogs er vegið ómaklega að starfsfólki Sjálfstæðisflokksins og látið í veðri vaka að það vinni fyrir einn frambjóðanda umfram annan. Kjörbréfanefnd vísar þessum fullyrðingum formannsins á bug.“
