Landsréttur hefur snúið við úrskurði Héraðsdóms sem ógilti ákvörðun Lögreglustjórans á Suðurnesjum, þess efnis að maður sætti nálgunarbanni gagnvart barnsmóður sinni til 1. september 2023. Landsréttur setti nálgunarbannið aftur í gang en stytti það frá ákvörðun lögreglustjóra og er maðurinn í nálgunarbanni til 1. apríl 2023.
Maðurinn er meðal annars sakaður um að hafa heimsótt soninn á leikskóla utan þess tíma sem umgengnisréttur hans nær til. Einnig er hann sakaður um ógnandi hegðun á leikskólanum, eða eins og segir í úrskurði héraðsdóms:
„Þann 22. júní 2021 hringdi brotaþoli á lögreglustöð og tilkynnti að barnsfaðir hennar, kærði, hafi deginum áður verið að áreita hana. Sagði hún að þann dag hefði verið kynningafundur á leikskóla sonar aðila og þar hafi kærði mætt óvelkominn. Hefðu starfsmenn leikskólans, sem meðvituð eru um hagi barns aðila, ákveðið að leyfa kærða að sitja fundinn svo hann myndi ekki valda uppnámi á leikskólanum.“
Konan tilkynnti ítrekað um hótanir mannsins og áreiti gagnvart sér. Við afritun á símtæki konunnar kom í ljós að maðurinn hafði meðal annars sent henni 50 sms skilaboð á stuttu tímabili, sem mörg hver voru ógnandi og óviðeigandi í hennar garð.
Ennfremur er í úrskurðinum að finna þessa lýsingu á áreiti mannsins í garð konunnar:
„Hefði kærði ítrekað ekið framhjá heimili hennar og heimili foreldra hennar. Seinna um daginn hefði brotaþoli farið á ferðina ásamt syni aðila og hefði þá séð kærða vera að elta hana á bifreiðinni […]. Hefði brotaþoli stöðvað bifreið sína við […], og tekið mynd af kærða á síma sinn þar sem hann sat í bifreið sinni. Hún hafi í framhaldi ekið heim til sín og séð kærða elta hana að innkeyrslunni. Kærði hefði stöðvað bifreið sína, staðið upp úr henni, og öskraði á hana “haltu áfram að taka mynd af mér hóran þín“. Þegar þetta hefði gerst hefði sonur þeirra staðið við hlið brotaþola og heyrt þetta allt saman. Kvaðst brotaþoli hafa miklar áhyggjur af hegðun kærða og var í uppnámi þegar lögregla ræddi við hana.“
